A muller rural chegou aos colexios con creatividade

A área educativa do CDR “O Viso” achegouse ata os centros educativos rurais de Vilar de Barrio, Sarreaus, Rairiz de Veiga, Baltar, Os Blancos e Sandiás, ó longo deste mes de marzo co afán de educar en igualdade e respecto a toda persoa, ademais de non deixar de por en valor a importancia da igualdade de dereitos e oportunidades.

A actividade, repetida en cada un dos centros, contou con dous momentos fundamentais. Nunha primeira parte, o alumnado escoitou a historia dunha “muller ilustrada” da súa zona. Sen ver ningunha imaxe, os nenos e nenas tiveron que debuxar a protagonista segundo a imaxinaban a partir do relato. Esta dinámica permitiu traballar a creatividade e a representación feminina na historia local. Na segunda parte, amosáronse oito imaxes de mulleres que acadaron fitos importantes a nivel mundial e os cativos debían adiviñar a que se dedicaban, fomentando así o recoñecemento das achegas femininas en diversos ámbitos e rompendo estereotipos de xénero.

Programa ELAS

Esta acción forma parte do Programa ELAS, financiado pola Consellería de Política Social e Igualdade da Xunta de Galicia, e o obxectivo de este programa é xerar actuacións de información, formación e participación activa das mulleres, en especial as que sofren situacións de vulnerabilidade e/ou as que residen no medio rural.