Os socialistas de Xinzo urxen crear o museo de Carlos Casares

Dende o grupo municipal socialista en Xinzo explican que o pasado xoves coñeceuse “a nova da reunión entre a Fundación Carlos Casares e o presidente da Deputación Provincial de Ourense, Luis Menor, na que se lle transmitiu a vontade por parte da fundación de ter a súa sede física en Xinzo”.

“Co fin de darlle a Carlos Casares o lugar que merece no centro da vila a través dun espazo propio, xurdiu a decisión no anterior mandato de mercar o edificio para ubicar a sede da fundación”, afirma a voceira do PSdeG-PSOE en Xinzo, Elvira Lama Fernández.

A edil socialista tamén apunta que a compra “asinouse o 13 de maio de 2023 por importe de 60.000 euros, a través dunha subvención da Deputación de Ourense, cun prezo estimado de rehabilitación de 350.000 euros”.

A voceira socialista manifesta que “despois dun ano, o Concello tivo tempo suficiente para redactar o proxecto de rehabilitación do inmoble adquirido polo Concello na Praza Maior coa finalidade de destinalo a futuro museo de Carlos Casares e a punto de información turística”.

“Cremos que en vista da boa disposición da Fundación Carlos Casares e do presidente da Deputación, Luis Menor, debe ser o Concello quen presente, sen máis retraso, o proxecto de rehabilitación á entidade provincial a fin de poder acadar o financiamento para o vindeiro ano e que ese importe sexa incluído nos orzamentos da Deputación 2025”, finaliza Elvira Lama.