A Merca convida a gozar do seu porco ó espeto

O Concello da Merca celebra o sábado 13 de setembro a XIV edición da Exaltación do Porco ó Espeto, unha das citas gastronómicas máis senlleiras da provincia. Está organizada pola asociación “A Peneda da Lebre”, coa colaboración do Concello de A Merca, o Inorde e a Deputación de Ourense.

O pavillón municipal de A Merca será o escenario desta cita, que abrirá as súas portas ás 12,00 horas co grupo de pandeIreteiras “As Ferrreñas”, xunto co mercado de artesanía e a primeira degustación de xamón antes do xantar, que será ás 14,30 horas e incluirá empanada ademais do protagonista, o porco ó espeto. As reservas pódense facer ata o día 9 de setembro.

Onte tivo lugar a presentación da festa na Deputación de Ourense, coa presenza de Rosendo Fernández, presidente do Inorde; Manuel Carrera, presidente da asociación; Tito SaMpedro, concelleiro de Cultura de A Merca, e o vocal da asociación.

Alí, o presidente do Inorde explicou que esta é unha das citas gastronómicas máis senlleiras da provincia xa que a súa orixe se remonta ó século XVII, xa que segundo os rexistros do ano 1620, don Pedro López Mosquera e Pimentel, xunto cos seus porqueiros, daban conta da súa facenda tódolos meses cunha feira, que se institucionalizou o 26 de cada mes “e que se segue conservando, xa que é o día da feira na Merca”, explicou Rosendo Fernández.

Fernández invitou a todos a acudir xa que “é carne de porco, polo que é saudable, asÍ que podedes comer a gusto”. Pola súa banda, Manuel Carrera fixo un chamamento ó relevo xeracional, “xa que Isto é unha homenaxe ós tratantes da Merca, ou como se chamaban eles, os porqueiros, que cada vez, por desgracia, quedan menos”.

Carrera explicou que esta data serve de “reunión de toda a xente do Concello”, para seguir mantendo a unión fronte o abandono do rural, “por iso llo queremos dedicar tamén a eles”.

O concelleiro de Cultura, Tito Sampedro, explicou que dende o Concello teñen por obxectivo “axudar e colaborar con estas festas, para promocionar o noso entorno, a nosa cultura e gastronomía”, ademais de “facerlle sempre unha homenaxe ós nosos antepasados nunha festa moi bonita”, e na que, segundo adiantou, se van consumir “mínimo 500 quilos”.