A Ponte Bibei, protagonista en Trives no seu 1906 aniversario

A asociación cultural A Caniceira celebrará este domingo 7 de decembro o 1906 aniversario da Ponte Bibei cunha charla aberta ao público, que ten lugar ás 18:30 horas no seu local da rúa Castelao, na Pobra de Trives.

A sesión será impartida por Ana García Earley, profesora de Historia no IES Xermán Ancochea Quevedo da localidade. Durante a conferencia, García abordará tres aspectos fundamentais para comprender a relevancia histórica e patrimonial desta ponte romana. Por unha banda, explicará o contexto das vías romanas e os factores xeográficos que explican a elección deste punto para levantar a infraestrutura. Tamén analizará as súas características arquitectónicas, que motivaron a súa declaración como Patrimonio Nacional en 1931. Ademais, repasará as vicisitudes que a ponte viviu ao longo de case vinte séculos de historia. Todo o contido irá acompañado dunha presentación con imaxes explicativas. A actividade forma parte da programación especial organizada por A Caniceira para poñer en valor un dos elementos patrimoniais máis destacados non só da comarca senon de todo o país.