Trives estrea un punto limpo móbil con coche eléctrico

O Concello da Pobra de Trives ultima os preparativos para a posta en marcha dun novo servizo de Punto Limpo Móbil, co obxectivo de facilitar á veciñanza a correcta xestión dos residuos domésticos especiais. 

Esta iniciativa busca achegar un servizo fundamental a todos os habitantes do municipio, independentemente do lugar onde residan.

Para garantir un uso eficiente e sostible, engaden que o Concello está a rematar o regulamento do servizo, que contará cun vehículo 100% eléctrico, permitindo realizar a recollida de residuos de forma ecolóxica e respectuosa co medio ambiente. “Este novo sistema reforza o noso compromiso coa mobilidade limpa e coa redución da pegada de carbono”, destacan desde o equipo de goebrno do Concello trivés.

O Punto Limpo Móbil, segundo sinalan desde o equipo de goberno, recollerá residuos que non deben ser depositados nos colectores convencionais, como pilas, baterías, fluorescentes, electrodomésticos pequenos, envases contaminantes e pequenos mobles, entre outros. 

Así con este novo servizo, que aínda non está en funcionamento, a veciñanza poderá desfacerse deles de forma cómoda e segura, contribuíndo á protección ambiental.

Desde o Concello da Pobra de Trives agradecen a colaboración cidadá e animan á veciñanza a facer uso deste novo servizo, que permitirá fomentar unha maior conciencia ecolóxica e avanzar cara a unha vila máis sostible. 

Nas próximas datas, sinalan que se publicarán os horarios e localizacións do servizo a través dos medios oficiais do Concello, así coma toda a información necesaria para poder beneficiarse deste novo servizo.