A Festa do Boi, nove días e máis de 50 actividades

Este sábado comeza unha nova edición da Festa do Boi 2023 de Allariz, unha das celebracións máis multitudinarias de Ourense, que se prolongará ata o 11 de xuño.

Entre as novidades desta edición está a imaxe da festa que foi froito dunha colaboración coa Fundación Vicente Risco. Con motivo do 60 aniversario do falecemento de Vicente Risco, a Fundación cedeu uns debuxos do escritor ourensán nos que aparecen representados gando vacún, feiras ou escenas do rural. Ademais, as imaxes utilizáronse tamén para o pano, as camisetas e para a programación.

Neste 2023 tamén se cumpren os corenta anos da recuperación da Festa. Corría o ano 1983, cando un grupo de mozos alaricanos decidiron recuperar que un boi percorrera as rúas de Allariz, e grazas a iso festexaremos nesta edición o corenta aniversario.

Durante a presentación da festa, Antonio Blanco, membro da Fundación Vicente Risco, explicaba que no proceso de catalogación de material gráfico que a Fundación está a realizar nos fondos, apareceron varios debuxos de gando, que Vicente Risco utilizaba para ilustrar os estudos que estaba a realizar.

Pola súa banda, a alcaldesa de Allariz. Cristina Cid resaltaba “a importancia de saber de onde xurde a Festa, de cara onde se quere ir para que actividades coma esta se consoliden no paso do tempo”. Así mesmo agradecía aos membros da Asociación Cultural Xan de Arzúa a súa implicación altruísta na Festa. “É unha festa organizada por persoas de Allariz para Allariz” explicaba Cristina.

Máis de medio cento de actividades

Durante 9 días desenvolveranse máis de 50 actividades. Música, teatro, actividades infantís, encontros populares e, por suposto, as saídas do boi centrarán, un ano máis, a programación festiva.

A Asociación Xan de Arzúa aposta polo carácter cultural e histórico da festa potenciando actividades como a procesión medieval na que participan máis de vinte gremios. Arredor de 600 persoas ataviadas cos seus respectivos traxes representan, de xeito divertido, a orixe da Festa do Boi.

Os nenos e nenas terán o seu espazo na Festa coa programación de actividades como as saídas do boi infantil, o espectáculo de monicreques creado polos centros de ensino de Allariz, o Pistaboi, a merenda infantil ou a actuación do mércores a tarde.

A música, como é habitual, terá unha importante presenza na Festa contando con grupos de gaiteiros, charangas e orquestras, e os tradicionais Zés Pereiras, entre outros.

A Festa do Boi conta cun orzamento de arredor de 82.000 euros, sufragado pola achega voluntaria dos veciños e veciñas, comerciantes e hostaleiros de Allariz aos que porta por porta se lles pide contribución, así coma entidades colaboradoras.