Polémica por mor do cambio de lugar das festas en Maceda

Este ano as festas da Virxe das Neves de Maceda viñeron con polémica. As festas cambiaron de localización e celebráronse no parque de Francisco Carballo, no Toural. Para o BNG de Maceda, a alcaldesa Uxía Oviedo, tomou esta decisión “sen ter en conta a opinión dos seus socios de goberno, os dous concelleiros do BNG, nin dos comerciantes, nin de moitos veciños”.

“Hai xente para todo, e disque algúns non teñen moita queixa: orquestra dun lado, Dj doutro, e o bar ás costas. Pero as Festas das Neves non son só música e alcol. Para nós as festas son moito máis”, explican dende o BNG de Maceda.

“Cremos que a alcaldesa cometeu un erro levando a festa para o Toural. Todos perdemos: os maiores que non desfrutaron da festa, e os non tan maiores que gostamos dunha conversa nunha terraza entre baile e baile; os bares, que non fixeron o agosto; e o ambiente do pobo, que se converteu, tamén nestas festas, nun pobo pantasma. O BNG vai propor e defender que se manteñan as Festas do 2025 no centro de Maceda, como foron sempre, con actuacións para todos e chamando a veciños e hostaleiros a que se comprometan con seriedade e responsabilidade”, defenden os nacionalistas.

A alcaldesa, Uxía Oviedo, pola súa banda, defendeu que “todos temos claro que as festas de Maceda teñen que ser algo máis. E por eso o son. Facendo autocrítica de como foron estas festas, estou contenta de como fixen as cousas e creo que non lle teño que pedir desculpas a ninguén. A festa, as orquestras e os Dj subíronse para o Toural. Sobra decir que a festa, a música e o alcol, cambiaron de lugar por un tema de responsabilidade. A música e o alcol sempre estiveron nas Neves, do que temos que estar orgullosos é de que non temos unhas festas que só se basan neso, temos unhas festas nas que todo ten o seu espazo”.

Pobo cheo

“Como alcaldesa e como persoa estou moi contenta por estas festas, porque encheuse o pobo todos os días. Pero en vez de ser na rúa principal, foi noutro lugar. O que si me entristece enormemente como alcaldesa pero sobre todo como persoa é que se faga política de algo que debería estar fóra da necesidade de ganar votos”, explica Uxía Oviedo.