Vicente Risco celebra os seus 140 anos cun percorrido pola vila

No ano do seu 140 aniversario, a Fundación Vicente Risco foi quen de “revivir” onte na vila alaricana ao intelectual nacionalista e autor prolífico da Xeración Nós Vicente Risco, que percorreu as rúas na compañía da súa muller, María del Carmen Fernández, grazas a un roteiro dramatizado que rematou na sede da Fundación, que acolle ademais a casa-museo do autor ourensán.

A mañá ameazaba chuvia, pero por sorte o tempo acompañou na camiñada, que contou coa presenza do conselleiro de Cultura, Lingua e Xuventude, José López Campos; o secretario xeral de Lingua, Valentín García; o delegado territorial, Manuel Pardo; o deputado provincial, José María Lago; a alcaldesa de Allariz, Cristina Cid, e a presidenta da Fundación Vicente Risco, Celia Pereira.

O roteiro iniciárono Tomás das Congostras e Manoliña, traballadores da casa-museo, pero a medio camiño “sorprendeunos o propio Risco cando nos atopábabamos na igrexa de Santo Estevo, xa que estaba a recoller frases feitas e refráns”, sinalou Celia Pereira.

Ao chegar á casa, os presentes descubriron que, ademais de Risco e a súa muller, alí tamén os “agardaba” Ramón Otero Pedrayo. Nun ambente festivo, tanto representantes institucionais como membros das fundacións Otero Pedrayo, Castelao, Blanco Amor, do Museo do Pobo Galego e da UVigo realizaron unha visita guiada pola casa-museo e, tralo turno de intervención, foron testemuñas dun Vicente Risco “redivivo” que soprou as velas dunha torta, e que deu paso a unha pequena celebración con viño e petiscos.

O conselleiro López Campos, que visitaba o museo por vez primeira, gabou o labor da Fundación polo traballo que realizan “para manter vivo un legado tan importante para Galicia”, e definiu a Risco como “alicerce da nosa cultura”.

Os actos polo 140 aniversario do nacemento do Risco continuaron á noite, cun concerto no Roi Xordo da banda de punk galega Radio Océano e de Xurxo Souto, que incorporou a poesía do autor.

Para a presidenta da Fundación, o máis importante é “seguir dando a coñecer toda a obra de Vicente Risco, dunha grande fondura e diversidade, e que perviva no tempo”, e lembrou que este luns presentan no Liceo de Ourense, ás 20,00 horas, o seu “Libro das Horas”.