3.000 persoas xa viviron o Festival de Xardíns 2025

O Festival Internacional de Xardíns de Allariz (FIXA) recibiu xa a máis de 3.000 persoas dende a súa inauguración o pasado 17 de maio, durante o Día das Letras Galegas, para coñecer de primeira man a proposta da súa décimo quinta edición.

Baixo o lema “O cambio climático: unha oportunidade para o xardín”, esta nova edición propón unha reflexión profunda sobre o papel dos espazos verdes fronte á emerxencia climática.

As dez propostas presentadas e convertidas en xardíns reais, convidan á acción, á esperanza e á transformación ó facer do deseño paisaxístico unha ferramenta de diálogo co medio.

Tras estas quince edicións, o FIXA segue a ser o único festival destas características en todo o Estado, e sen dúbida, continúa a medrar como referente para especialistas do sector, para o público xeral e como un dos grandes atractivos turísticos alaricanos.

O volume de visitas que recibe o recinto consolídano como unha das citas de referencia no panorama paisaxístico e cultural, reflectindo o interese crecente por iniciativas que combinan arte, natureza e conciencia ambiental.

A maiores das dez propostas que enchen o FIXA este ano, tamén están expostas as dúas gañadoras da edición anterior, “O xardín do revés” e “Entra nunha obra de arte”.

Horarios

O Festival de Xardíns cambiou o seu horario, empezando o de verán, que manterá ata o vindeiro 14 de setembro. O recinto estará aberto polas mañás en horario de 11,30 ata as 14,00 horas, e polas tardes dende as 17,00 ata as 21,00 horas. A partir do 15 de setembro, volverá ó horario só de tarde entre semana, dende as 16,00 ata as 19,00 horas, e durante as fins de semanas e festivos abrirá tamén de mañá de 11,30 ata as 14,00 horas. O recinto permanecerá aberto ata o 31 de outubro.