Allariz acollerá unha xornada de paisaxismo

“Imaxinación en flor: a arte do xardín efémero” é o lema baixo o cal a Asociación Española de Paisaxistas (AEP) organiza unha xornada profesional en Allariz, que terá lugar o vindeiro venres, 3 de outubro.

O Fogar do Maior alaricano converterase no escenario para un encontro que reunirá a especialistas, académicos e profesionais do paisaxismo para desfrutar dunha xornada ateigada de conferencias, mesas de debate e experiencias creativas, así como unha visita ó Festival Internacional de Xardíns de Allariz (FIXA).

A cita dará comezo ás 9,00 horas ca presentación institucional, na que participará a alcaldesa de Allariz, Cristina Cid, xunto ó presidente da AEP, Iñaki Viñuela. A continuación, Francisco García, o director do FIXA ofrecerá unha exposición sobre a orixe do Festival de Xardíns alaricano.

Logo será a quenda de Íñigo Segurola, socio da AEP, que falará sobre o LUR Garden, “Jardín de Jardines”, antes da primeira pausa da xornada. Á volta, será a quenda de Tino Feijóo, responsable da construción do FIXA, quen falará sobre “La construcción de un jardín efímero. Del papel al terreno”.

Ás 12,30 horas dará comezo a mesa redonda, que estará moderada por Charo Piñango, paisaxista e socia da AEP, e na que participarán Manuel Sánchez, profesor e representante internacional da AEP; Ralque Casas, directora do master de paisaxismo da UPM e xurado do FIXA, xunto con Juan A. Caridad, coordinador do grao en Paisaje da UDC.

Durante a velada farase a entrega de premios “Xardín Galego” da Asociación Galega de Empresas de Xardineira (AGAEXAR), da man da alcaldesa e Bernardo Varela, concelleiro de medio ambiente de Allariz.

Despois da pausa para xantar, continuarán as exposicións pola tarde, da man de José Souto, Sinda Dávila, Adriana Villar e Lara Caamaño, que centrarán os seus relatorios no FIXA e nas experiencias creativas para ós estudantes de paisaxismo.

Para rematar, farase unha visita á edición 2025 do Festival Internacional de Xardíns, que este ano está centrado no cambio climático como unha oportunidade para o xardín, ademais dos xardíns gañadores da edición anterior.