Allariz programa máis de trinta citas para este verán

A axenda estival do Concello de Allariz ofrecerá ata o mes de outubro máis de trinta actividades nun programa que inclúe citas xa asentadas na localidade como o Festival Internacional de Xardíns —aberto na rúa Portovello ata o outono— e as festas de San Bieito.

A actividade continuará en xullo co Festival Literario (días 3 e 4) e as propias celebracións de San Bieito (do 10 ao 12), que contarán coa obra teatral Ñiquiñaque e a música de Castro Floxo. O 24 de xullo celebrarase a Festa da Patria con concertos nos Xardíns do Museo do Coiro.

Xa en agosto, a fin de semana do 22 e 23 acollerá a Festa da Empanada, coincidindo co tríatlon Vila de Allariz, a regata de piragüismo e actuacións musicais. O teatro de rúa programarase os días 7 e 21. A finais de agosto arrancará o festival de curtas de comedia RIR, seguido en setembro polo Ciclo Mestre Mateo.

No eido patrimonial, organizaranse tres roteiros temáticos guiados e levaranse a cabo novas quendas de escavación arqueolóxica na Cibdá de Armea.

Xornadas da Carne do Boi

O calendario pecharase co mercado de artesanía e a feira apícola a principios de setembro e unha das citas gastronómicas máis agardadas do calendario, as Xornadas da Carne de Boi, que se celebrarán do 25 de setembro ao 11 de outubro na vila alaricana.