A crise pediátrica en Xinzo agrávase con outra baixa

Dende xa hai varios meses, o servizo de pediatría do Centro de Saúde de Xinzo de Limia ten unha atención “deficitaria, debido á falta de persoal sanitario”, segundo a plataforma pediátrica de A Limia, que reclamou nunha carta formal dirixada aos alcaldes da bisbarra que estiveran ao seu carón na procura “dun servizo digno e de calidade”. A pesar de contar co apoio dos devanditos rexedores, a situación empeorou aínda máis debido a baixa da única pediatra que estaba dispoñible e que deixa ao Centro de Saúde de Xinzo nunha situación que cualifican de “moi crítica”.

O recomendado, dado o número de poboación, é ter un servizo de pediatría dunhas oitenta horas á semana, e agora mesmo o Centro de Saúde de Xinzo ten servizo de pediatra de únicamente vinte horas e nove horas de puericultura.

Camilo Vila, voceiro municipal do BNG de Xinzo, lamentou que se estea a cumprir un dos escenarios que se advertiron nas últimas reunións co grupo de Goberno. “Malia a boa vontade predicada polo Partido Popular, os feitos indican que o servizo de pediatría de Xinzo corre un grave risco. Dende o verán unha das facultativas atópase de baixa e o remendo da xerencia do Sergas é absolutamente insuficiente”, apuntaba Vila.

Vila aludiu tamén “á improdutividade da reunión mantida a semana pasada co resto da corporación municipal, onde quedaron invalidados tanto o argumento de que non hai pediatras coma o de que é imposible administrativamente cubrir o servizo”. A maiores, advirte de que “é unha irresponsabilidade mandar a calquera neno menor de catro anos directamente ó servizo de Urxencias do CHUO pola conxestión do servizo e polo que significa tal volume de desprazamentos”.

A reunión para tratar este asunto, na que está prevista a participación do conselleiro de Sanidade, Julio García Comesaña, pasará a celebrarse o día 30.