Parada de Outeiro rendiu homenaxe ao que foi o seu párroco durante 49 anos

Miguel Fernández Grande dixo adeus aos seus feligreses con todas as honras e descubrindo, da man do rexedor de Vilar de Santos Xan Jardón, unha placa coa súa imaxe ao carón do templo. "Intelixente, inquedo e coherente" foron os adxectivos que empregou o novo párroco de Parada de Outeiro, Don Manuel, para calificar ao seu predecesor no cargo durante case medio século.

O acto conmemorativo, que contou coa presenza doutros cargos do municipio como o ex rexedor e coordinador do Museo da Limia, Antón Jardón; o presidente da entidade, Delfín Caseiro e outros curas da comarca da Limia, comezou ás 12,30 horas coa celebración dunha eucaristía. Nela, o actual párroco louvou as tarefas realizadas por Don Miguel ao longo destes anos. "Buscou sempre o progreso cristián e humano da parroquia, fomentando todas aquelas actividades que axudasen a crear un espírito de comunidade", dixo. "Sempre pensou en vostedes e nunca nel mesmo. Foi un transformador da cultura e un galego de pés a cabeza. Convencido. E, por este motivo, fomentou o noso idioma sempre que puido e tivo ocasión de facelo", engadiu.

Na súa aposta por dinamizar a vida do rural, en xeral, e de Parada de Outeiro, en particular, Don Miguel fixo un campo de fútbol na localidade e creou un obradoiro no que se celebraron infinidade de cursos en todos estes anos. O octoxenario párroco, formado no Seminario de Ourense, sempre estivo convencido da importancia de ter un espírito cooperativo e asociativo.

Durante a misa, que durou algo máis de dúas horas, foron varios os amigos e persoas cercanas que quixeron adicarlle unhas verbas, entre eles, o rexedor local, Xan Jardón. "É unha honra para nós colaborar neste evento, xa que se trata dun obrigado recoñecemento", dixo o primeiro edil de Vilar de Santos. "Don Miguel foi un home comprometido co noso pobo e coa nosa lingua, pois nunca renunciou a empregala", engadiu.

Jardón enxalzou ao xa expárroco como unha persoa que "representou un punto de inflexión e unha vela de esperanza e de futuro. Sempre traballou dende a súa condición de ser un veciño máis".

O evento continuou coa retirada dunha bandeira galega, trala que apareceu unha placa conmemorativa. A nota musical púxoa un gaiteiro que interpretou o hino do antigo reino de Galicia. Logo dun forte aplauso, un tímido e emocionado Don Miguel quixo dar as grazas a todos os presentes polo seu cariño. ¡Saúde e longa vida para o párroco de Parada!, escoitouse para rematar, da voz dun dos seus amigos cercanos.