Maceda activa o seu programa de acollida de verán para favorecer a conciliación

O Concello de Maceda vén de activar o seu programa de acollida de verán para favorecer a conciliación familiar durante os meses de xuño, xullo, agosto e setembro. Neste senso, haberá tres iniciativas nas que poderán participar os cativos do municipio -sempre que as inscricións se formalicen antes do vindeiro día 17 de xuño-: o Contacontos acollida, a Ludoteca no verán e a Acollida no verán.

A actividade de Acollida no verán será a máis duradeira, pois prolongarase do 23 de xuño ata o comezo do curso 2022 / 2023. Permitirá aos cativos do Colexio de Maceda -xa inscritos ou non neste servizo-, así como aos empadronados na vila, disfrutar del en horario de 07,30 horas a 16,00 horas de luns a venres.

Maceda tamén contará co proxecto Contacontos acollida, aínda que, nese caso, será soamente durante o mes de agosto de luns a venres -a excepción dos días 8 e 9 dese mes- e estará dirixido ao alumnado da escola infantil municipal. Durante o periodo que dure a proposta, fomentaranse as habilidades sociais dos cativos mediante os xogos.

Por último, a Ludoteca no verán estará aberta do 1 de xullo ao 31 de agosto -de luns a venres e a excepción dos días 8 e 9 de agosto- e as actividades neste caso celebraranse nas piscinas municipais, no parque multiusos, na pista de pádel ou no pavillón Pablo Rodríguez Guede.

A concelleira de Servizos Sociais, Ana María Rodríguez Blanco, afirmou que o Goberno local “considera a axuda á conciliación unha prioridade, por iso fomentamos o coidado e as actividades lúdicas dos nenos e das nenas no verán”.