Lembranza Solpor, o grupo de Celanova que busca visibilidade para crecer

A asociación Lembranza Solpor, que atesoura os 44 anos de historia dunha das agrupacións máis queridas de Celanova, prepara o novo curso co reto de seguir crecendo musical e culturalmente. Tras o ‘impasse’ que supuxo a pandemia, da que saíron reforzados cunha renovación na dirección e na docencia, a agrupación aspira neste novo curso a superar a barreira dos cen alumnos, duplicando aqueles que retomaron as clases na primavera de 2022. “En setembro abrimos inscricións, e esperamos ter un pouquiño máis de xente que o ano pasado, que foron 80 entre música e baile”, comenta a presidenta da asociación, María Fernández Iglesias, moi contenta coa evolución da agrupación, así como o agarimo e o apoio veciñal e institucional.

A Casa da Música é o espazo no que imparten clases de música e baile galego, para as cales abrirán inscricións a partir de setembro, ademais dos ensaios da agrupación. “Non nos podemos queixar pero, evidentemente, todo o que veña, benvido sexa. Hai necesidades de instrumentos e de roupa. Pero para iso estase traballando”, recoñecen na escola que, para o próximo curso, trasladará as súas clases aos venres e sábados.

Aos poucos, e con moito traballo detrás, “vanse cumprindo aqueles proxectos que nos marcamos ao principio”, recoñece Fernández Iglesias, relatando a recente viaxe que realizaron a Festival Intercélticu de Avilés -emulando aquelas xiras que Solpor protagonizou a finais do século pasado-; o seu exitoso debut no Campionato de bandas de gaitas de Xinzo; e contando os días para o “I Festival Lembranza Ibérica” que, do 24 ao 26 de agosto, organizarán na vila de San Rosendo. “A idea é un pouco promocionar o traballo que se está facendo dentro da Asociación Lembranza Solpor, que se visibilice o tema folclórico, Solpor, a historia que ten…”, comentan dende a directiva, ilusionados de recuperar o brillo que tiña Solpor en Celanova, “darlle ese pulo de abanderados da nosa vila onde se vaia”, insisten dende a gran familia que é Lembranza Solpor. “Temos a sorte que hai un montón de xente que pensa o mesmo e temos que tratar de remar todos á unha”, salientaba María Fernández quen, sobre o festival, dixo que “é o primeiro, pero se ten éxito, oxalá que sexa por moitos anos”.

A programación, de xoves a sábado, a abrirán o primeiro día os grupos locais Banda de Gaitas Concello de Celanova, Pandereteiras Celavella e Amigos do Acordeón Terras de Celanova. O venres e o sábado haberá pasarrúas, concertos (Andoa e Os Escatxapalletas), foliadas, obradoiros, xogos populares e o “I Festival Lembranza Ibérica” con participación dos grupos Mariño Tapiega (Asturias), Inquedanzas (Tui), Rebulir (Ramirás) e Lembranza Solpor.