A bolboretiña do día | Miñocas, vermes e lombrigas

Para que escoller? Se podes ter dúas palabras, non teñas unha, así, en xeral. Son os sinónimos. O dicionario recolle as dúas, miñocas e miocas, se ben lle dá certa preferencia á primeira onde fai a descrición e os nomes científicos. Eu doulla a mioca, porque é como digo desde sempre. Nos textos do XIX son maioritarias as miocas porque Lamas Carbajal e o Tío Marcos da Portela usan sobre todo esa forma. Fóra de Ourense, si, gañan as miñocas. En Portugal, tamén, e miocas é só un rexionalismo de Tras-os-montes, os nosos veciños. Para nós as miocas-miñocas son un tipo de vermes que en castelán chaman “lombrices”. Pero os galegos, como os romanos, distinguimos entre vermes, os de terra, -entre eles as miocas- e lombrigas -do latín lumbricuseses grimosos do intestino e que os que temos certa idade tivemos. En fin, como agora os nenos xa nin cortan miocas pola metade cos dedos, nin comen terra, e hai esta vivencia case enfermiza da hixiene, pois xa non as teñen. E iso que estaban connosco desde que o mundo é mundo. Pero un alivio, tamén pruían alá onde saben vostedes. E os que non o saben, pasan ben sen sabelo.