A música e o baile tradicional serán de Interese Cultural de Galicia

Un encontro con agrupacións e formacións galegas celebrado onte no Museo Etnolóxico de Ribadavia foi o escenario escollido pola Xunta de Galicia para anunciar os seus plans para a declaración da música e o baile tradicional como Ben de Interese Cultural (BIC). “Galicia non se entende sen a súa música e os seus bailes tradicionais”, dixo o conselleiro de Cultura, Lingua e Xuventude, José López Campos. Manifestacións culturais que son “legado dos nosos devanceiros e que, agora, temos a obriga de conservalo, protexelo e legarllo ás xeracións futuras”, engadiu.

Acompañado do alcalde César Fernández, o delegado Manuel Pardo, así como os directores xeral de Cultura, Anxo Lorenzo, e de Patrimonio, María del Carmen Martínez, López Campos puxo de manifesto o “papel esencial” que tiveron en todo este tempo os colectivos e asociacións folclóricas, e agradeceu o seu “inquebrantable compromiso con este legado”.

O procedemento, que levará un máximo de 24 meses, persegue investigar, transmitir e protexer este legado inmaterial

O expediente, que mañá luns iniciará a Dirección xeral de Patrimonio Cultural, persegue lograr a máxima protección “acorde coa súa relevancia no noso patrimonio inmaterial” nun procedemento que deberá resolverse nun máximo de 24 meses.

A declaración levará implícito accións en tres ámbitos. Por unha banda, a investigación científica e académica; por outro a transmisión, ensino e sensibilización; e un terceiro grupo de medidas que estarán encamiñadas á protección, conservación, mantemento e revitalización. Para iso facilitarase desde a firma de convenios con entidades para a catalogación e dixitalización de arquivos, ata a colaboración cos docentes para a elaboración de materiais didácticos para a educación formal ou actuacións de sensibilización coas ANPAS para a súa inclusión nas actividades extraescolares.