Actividades familiares, teatro e concertos no Nadal verinés

Na tarde deste venres abre ata o domingo a Feira de Nadal na Praza Maior, con máis de 33 expositores e obradoiros para a cativada tódolos días entre as 16,30 e 19,00 horas. Hoxe á noite tamén se acenderán as luces das decoracións do Nadal da vila.

No eido cultural e musical destacan a obra de teatro “O auto do Castromil”, o vindeiro 15 de decembro no Auditorio, así como o concerto de Nadal do Conservatorio Profesional de Música de Verín, no mesmo lugar o 20 de decembro. A exposición “Pintura e Tinta” de Pedro Castro, inaugurada onte, estará aberta na sala de exposicións ata o 7 de xaneiro.

O 22 de decembro o Auditorio acollerá a representación “Yallah-Yallah”, e o día 28 terá lugar nel o concerto de Nadal da banda Nova Era, “A un paso dos dez”. Por último, o día 2 de xaneiro celebrarase no pavillón de deportes a Gala de Nadal de Aever.

Para toda a familia

Os máis pequenos serán os protagonistas do LudoNadal, un espazo de lecer infantil que estará en funcionamento dende o 23 de decembro ata o 7 de xaneiro. Tamén poderán gozar de espectáculos familiares como “O Apalpador e a Nena sen medo”, o 20 de decembro na Casa da Cultura, ou “Os Bolechas”, o 3 de xaneiro no Auditorio. Cabe destacar que tódalas as fins de semana haberá cinema comercial na Casa da Cultura.

E como non podía ser doutro xeito, os Reis Magos visitarán Verín, cunha gran cabalgata o 5 de xaneiro que percorrerá as principais rúas enchéndoas de cor e música.

Belén da Viruca

No ámbito relixioso, sobresae a Festividade da Virxe María Inmaculada, este domingo, o emblemático Belén da Viruca, que estará aberto ata o 6 de xaneiro, e a tradicional misa do galo na Noiteboa.

O vindeiro 15 de decembro haberá un obradoiro de coroas florais co que se convida á veciñanza a crear decoracións para estas festas. Por outra banda, Aever organiza un pasarrúas temático coa presenza de Papá Noel o día 24, e a súa campaña “Os 6.000 de Verín”, na que o comercio local reparte 6.000 euros en premios, continúa activa ata o 26 de decembro.

O programa complétase con dous espectáculos no Auditorio: o monólogo de Leo Bassi “Yo, Mussolini”, o 14 de decembro, e concerto de Xabier Díaz & Adufeiras de Salitre, o 21 de decembro.