O Concello saca peito co éxito de xente no Lázaro

A concellería de Turismo do Concello de Verín fixo no día de onte balance do que foi a recentemente celebrada feira do Lázaro na vila. Segundo os datos que manexa ese departamento, máis do 90 por cento dos expositores que participaron nela volverían a repetir nunha vindeira edición, chegando incluso ao 100 por cen no caso da feira do libro. Purificación Caldelas, a concelleira, quixo destacar que "aínda que o número de vendas nesta edición estivo condicionado polas inclemencias meteorolóxicas, as novas actividades tiveron unha grande acollida.

Foi un éxito a organizacións dos complementos pedagóxicos, no que participaron medio cento de nenos e a nova mostra de vehículos de ocasión tivo unha moi boa acollida". Foron, pola contra, as vendas as que suspenderon no exame proposto aos participantes: os artesáns valoraron por debaixo do 5 as cifras da súa caixa (4,38) e no caso dos establecementos situados no pavillón polideportivo tamén recibiron o peor díxito de todos os aspectos consultados pola organización, un seis.

Sen dúbida, o evento que máis xente concitou foi o museo do claustro dos Mercedarios, polo que pasaron 2.700 persoas.n