O Entroido de Laza -que xunto con Verín e Xinzo conforman o Triángulo Máxico-, reinvéntase , e entre unha serie de iniciativas que darán comezo a vindeira semana a través das plataformas dixitais, este xoves as aldeas de Laza anoitecían con tres novos veciños.
Ricardo, Joaquín e José Benito, tres mecos que os veciños de Laza quixeron deixar en Cimadevila, na Rúa e en Souteliño, pasarán a acompañar aos veciños e veciñas lazanos durante estas datas tan sinaladas na localidade.
Esta iniciativa, que coincidía co xoves de compadres, é unha maneira de visibilizar o Entroido que por mor da crise sanitaria do covid non se vai celebrar.Estes mecos que se deixaron en diferentes núcleos rurais do Concello de Laza son a antesala dunha serie de propostas que lembrarán esta celebración lazana durante os vindeiros días.
Proxeccións de Entroidar
Na situación sanitaria actual, levar a cabo proxectos de forma presencial é complicado -por non dicir imposible-, polo que asociacións, grupos, empresas e demais colectivos buscan a maneira de reinventarse.
Isto é o que aconteceu coa proxección de Entroidar, un documental que fala sobre o Entroido de Laza, que contou coa colaboración dos veciños lazanos e en especial de Xacobo Novoa e Iris Justo, dous mozos de Laza e Verín con gran interese no audiovisual e no Entroido.
Entroidar, de Pablo Ces, foi presentado no FIC de Verín, e agora, con motivo das datas de Entroido, comeza a percorrer diferentes camiños.
Nos vindeiros días poderá visualizarse en diferentes entidades, todas de maneira online a través das redes. A primeira cita é este sábado, ás 11:00 horas da man da Asociación Xirandela. O domingo, ás 12:30 horas será o turno da Agrupación Rosalía de Castro, e ao longo da próxima semana serán varios centros educativos os que amosen este documental aos alumnos.
