Dende o mediodía deste mércores, a Praza García Barbón recolle un mural cunha clara idea: "A nosa responsabilidade colectiva debe poñernos en "pause" este Entroido". Con isto, o Concello de Verín quere enviar a todos os seus veciños unha mensaxe de esperanza, de confianza no futuro e de paciencia e contención nas presentes datas.
Dende a casa consistorial, tras colocar o mural na praza da vila do Támega, aseguran que "pause non é stop, senón que é agardar, reservar, aplazar, postergar, demorar, prorrogar, pero en ningún caso abandonar". Debido á situación sanitaria actual, dende o Concello de Verín procuran xeitos simbólicos de lembrar o Entroido -patrimonio cultural- e insisten en "facer da paciencia máis virtude ca nunca".
"A mellor homenaxe que se lle pode facer á nosa celebración máis querida é cumplir coas normas sanitarias", aseguran dende o grupo de goberno municipal, a diferenza doutras épocas históricas, nas que a rebeldía e a trangresión foron en si mesmas o xeito de manter vivo o Entroido.
A colocación deste mural, que ten por protagonista ao Cigarrón e un botón de pausa, na Praza García Barbón -esceario central desta celebración e punto de concentración de millerios de persoas- quere simbolizar que "todos estamos alí, aínda que cada un desde o noso corazón, cumprindo coa nosa responsabilidade para voltar con máis forza cando sexa posible", engaden dende o Concello, que remarcan que "o Entroido só está en "pause" e nunca en off".
