A sexta edición do Festival Internacional de Curtametraxes de Verín, FIC Vía XIV, acollerá, dentro das súas actividades paralelas, a presentación da obra "Sonido para Audiovisuales", cuxos coatures son Marco García Torres e Rafael Godás Ibáñez, profesores na área da imaxe e do son.
Esta publicación traslada aos lectores técnicas, trucos e exemplos de probada eficacia para que poidan empezar a crear bandas sonoras con resultados profesionais.
Ademais, "Sonido para Audiovisuales" está editada por Altaria, unha editorial especializada en manuais técnicos para estudantes de audiovisuais, e como sinala Godás Ibáñez, "o primeiro público obxectivo da obra é o dos estudantes porque nós, os autores, somos profesores", engadindo que "con esta presentación, a primeira que realizamos da obra, pretendemos ampliar o público ao que se dirixe e levala tamén ata posibles creadores".
Pola súa banda, Carlos Montero, director do FIC Vía XIV de Verín, destaca que "a ligazón entre son e cinema ten un amplo percorrido e no noso Festival adoitamos dedicar a esta cuestión algunhas das nosas actividades paralelas, por iso decidimos que esta obra se presente no marco do noso certame: como un xeito de seguir afondando na conexión entre ambos os eidos".