Novos obradoiros gratuítos impulsados pola Mancomunidade de Monterrei

O Centro de Información á Muller (CIM) da Mancomunidade de Monterrei está a impulsar obradoiros para o empoderamento, abertos a toda a veciñanza da comarca. Dende a danza ao deporte, incluíndo a creación dun grupo de teatro. “Poderosas” é o nome de dito grupo, que terá unha duración de dous meses e está destinado a mulleres e adolescentes. As clases serán impartidas por Santiago Cañaveral, profesor de teatro en Verín, e busca empregar esta arte como unha ferramenta para o desenrolo social dos participantes.

Dende o CIM tamén lanzan un curso de “Mindfullnes”, outro de ioga e outro de pilates de dous meses de duración. Ao igual que un obradoiro de flamenco, outro de baile latino e zumba, así como un de baile moderno. Tamén se organiza un curso de ballet para nenos de entre tres e oito anos, co fin de traballar con eles a atención, concentración e motivación.

Os talleres desenrolaranse nas salas deportivas de Verín, co fin de lograr o empoderamento social, unha relación de confianza co propio corpo e aprender a reconectar mente e físico, ademais de axudar a crear un estilo de vida positivo de autocoidado.

As actividades son gratuítas para os participantes, pois están subvencionadas polos sete concellos que forman parte da Mancomunidade, a través do Pacto de Estado 2022.