O Partido Popular de Verín, ante a actual situación sanitaria, pídelle ao grupo de goberno municipal que valore a opción de buscar formas para axudar ao sector productivo do concello. Juan Manuel Jiménez, portavoz do PP, asegura que "se hai un sector tremendamente afectado é o da hostalería, e estes requiren unha resposta integral, coa implicación de todas as administracións públicas".
Aínda que o Concello de Verín puxo en marcha unha axuda de 300 euros -algo que supón un gasto total de 36.000 euros aproximadamente-, Jiménez Morán considera "insuficiente esta axuda". O popular cre que "hai unha serie de actividades e incluso inversións que son prescindibles nuns momentos no que o importante é apostar polas persoas e por manter a actividade económica no noso municipio".
Así, baixo esta premisa, este xoves os populares de Verín presentaron unha moción para proporlle ao grupo de goberno que, con cargo a diversas partidas que "non se utilizaron nin se van empregar -250.000 euros neste 2021-, se aprobe e se implante unha serie de medidas".
Entre as medidas que propón a oposición atópase a exención da taxa do lixo aos establecementos que tiveron que pechar, a bonificación das taxas de auga e saneamento para familias en situacións de vulnerabilidade, así como aplicar a exención do canon de saneamento aos establecementos que cumpran os requisitos.
Os populares tamén ven conveniente realizar un estudo previo respecto a autónomos, pequenas e medianas empresas que notaron a súa actividade prexudicada durante o estado de alarma, para buscar a posibilidade legal de establecer axudas, "sempre que exista dispoñibilidade orzamentaria", remarca Jiménez. Ao mesmo tempo que o apoio á comercialización de produtos locais a través de novas tecnoloxías e a aplicación dos tipos mínimos legais de diferentes impostos.
Ademais, para favorecer a promoción económica e o asentamento de novas empresas, o Partido Popular considera oportuno "facer un plan de medidas fiscais e subvencións para compra de solo empresarial, así como diminuír o imposto de contrucións ás cifras mínimas que permita a lei".
Moción de urxencia
O PP xa propuxo no pleno do 4 de maio de 2020 unha moción de urxencia para paliar os efectos económicos negativos da pandemia, que foi rexeitada polo bipartito. Dita proposta volveuse levar a pleno cando se debatiu sobre os orzamentos para 2021, recibindo a mesma resposta por parte do grupo de goberno.
