Cinco orquestras actuarán nas verbenas do San Cibrao

As festas patronais do Carballiño contarán con cinco orquestras, entre elas a Panorama e o grupo Assia, ademais de Status, Ritmo Joven e Fuerza Nueva. Unha vez máis, desde a organización decidiuse que as actuacións comecen xa pola tarde, co fin de facilitar ó público infantil e ó de maior idade a oportunidade de disfrutar dos espectáculos. Ademais, actuará o grupo galego The Tetas’ Van, que realiza versións de clásicos do rock and roll, en inglés e en galego. No apartado de bandas de música, as festas contarán ca Agrupación Musical de Boborás e, o día do patrón San Cibrao, coa Agrupación Musical da Limia. Así mesmo, actuarán as charangas Dr. Anchoa, CLK ou Castro Bello, e grupos de música tradicional galega. O día de feira, o 16 de setembro, será o da tradicional gran tirada de fogo fixo e voador, no Parque municipal e os nenos tamén terán unha festa infantil o día 18, festivo local. Nesta xornada poderán desfrutar dun baile a cargo de DJ.Tibu e da recuperación de xogos tradicionais. Nesta edición cóntase con dúas concentracións de coches, actuacións das corais da vila, exposicións fotográficas, un torneo de xadrez, fútbol e a tradicional Romaría da Saleta, ademais da Feira de Artesanía Pepa Loba, que inaugura as festas esta próxima fin de semana, no Barrio de Flores. A comisión organizadora recorda que este sábado estará na Praza Maior, de 16,30 á 20,30 horas, e o domingo de 10,30 ás 14,00 horas, co fin de facilitar á veciñanza que fagan as aportacións económicas á festa e así recoller o tradicional libro, que este ano inclúe colaboracións de varios escritores da vila que publicaron recentemente e con fotografías antigas de familias, “pandillas” e persoeiros históricos, grazas á colaboración de José Luís Diz, autor tamén do cartel.