Francisco Gil imparte unha charla sobre o éxito dos viños

Francisco Gil Fernández, periodista e escritor relacionado coa enoloxía e gastronomía, imparte hoxe unha charla no Museo do Viño de Galicia (Ribadavia) sobre “Os viños galegos nos grandes concursos internacionais. Unha década de éxitos crecentes”, ás 18,30 horas.

No Ribeiro, “temos que dicir que, se ben foi Rías Baixas a pioneira en participar nos concursos internacionais, e de feito a primeira medalla de ouro que logra un viño branco español no concurso de Burdeos foi para Condes de Albarei en 1991, a partir da crise de 2008 foi crecendo a participación dos viños ourensanos ate chegar a lograr máis medallas que Rías Baixas, que posúe máis viñedos e adegas que o resto das DO galegas xuntas”, matiza Francisco Gil.

Nese sentido, sinala que “o caso máis significativo este ano, é o viño do Ribeiro, Ramón do Casar, que logra o premio ao mellor viño branco de todo o mundo no Challenge International du Vin de Burdeos e o premio Alimentos de España do Ministerio de Agricultura ao mellor viño de España e o maior número de medallas nos concursos nacionais e internacionais”. Por iso, afirma que “a Treixadura, xa compite sen complexos co Albariño como xa o facía hai uns anos o Godello”.

Considera que “a participación dos viños galegos nos grandes concursos internacionais reflicte a súa historia recente. Os primeiros éxitos, na década de 1990, coincide co rexurdir dos viños brancos a partir da recuperación das variedades tradicionais”.