Coles recupera Casa Conde

Cando o pasado mes de decembro empezou a comentarse entre os veciños de Coles que Santiago Couto, Santi de Casa Conde para todos, baixaba a persiana da cafetería, a pesadume extendeuse por todo o concello: perdíase, máis que un bar, un espazo de encontro para todos os veciños e veciñas. Un negocio que oito meses despois volve a estar en funcionamento grazas a Sonia, veciña de Amoeiro, pero asentada da aldea de A Madanela, moi preto de Vilarchao.

"Sempre me gustou este local e me gustou a hostelería", explica Sonia, con formación en márketing, retornada a Ourense no 2021 despois de sete anos traballando no Reino Unido. "Cada vez que pasabamos por diante de Casa Conde pensaba: que marabilla de local, con este xardín e o gran aparcamento". Por iso, despois de pensalo un pouco, "pois a hostelería é un sector que se pode facer moi duro", decidiu dar o paso e poñerse á fronte do coñecido negocio de Coles.

O pasado 9 de agosto tivo lugar a inauguración desta nova etapa, cun espectáctulo de baile a cargo das Meigas Tribal. Desde entón, en horario de 7:00 a 23:00 horas, Sonia e o resto de empregados de Casa Conde, ofrecen almorzos que van desde churros, croissant ou torradas, e tamén opcións sen glute. "A nosa intención é poder dar ademais algunhas racións e tapas polas tarde-noites", conta Sonia.

Aposta pola cultura

Sonia, que forma parte da Asociación Cultural Trulhada, quere que Casa Conde se converta nun espazo referente e de promoción da cultura. Por iso, "queremos facer intercambios de libros, entre outras actividades culturais que teño na cabeza, como concertos, etc".

Dirección: Vilarchao, 12 - Baixo, 32152 Coles.