Castrelo de Miño aspira a impulsar o asentamento de novas empresas

A conselleira de Economía e Industria, María Jesús Lorenzana, mantivo un encontro co alcalde de Castrelo de Miño, Avelino Pazos, con quen abordou, entre outros asuntos, as posibilidades de impulsar medidas que favorezan o desenvolvemento industrial do municipio. Na reunión, expuxéronse os beneficios do Programa Concello Emprendedor, ao que está adscrito Castrelo de Miño desde o ano 2021. Unha iniciativa da Xunta de Galicia que busca ofrecer facilidades ao investimento empresarial para impulsar a reactivación económica e, polo tanto, ofrece máis axilidade na tramitación administrativa, no acceso ao solo industrial e maiores incentivos fiscais.

Lorenzana lembrou as tres liñas de axuda para contribuír á competitividade, concretamente, para a creación de viveiros industriais, para a mellora de infraestruturas e servizos e para o reforzo e extensión das redes de distribución eléctrica.