A coral De Ruada recibe en Ourense o Premio Otero Pedrayo: un referente da defensa e difusión da cultura galega

Vestidos de gala, os integrantes da coral De Ruada recibiron onte o Premio Ramón Otero Pedrayo 2024 no paraninfo do IES que leva o nome do insigne galeguista. “Non se trata só dunha agrupación folclórica, senón que é unha institución galeguista e auspiciada pola Xeración Nós”. Así foi como o xurado se referiu á institución no fallo deste recoñecemento.

Foi en outubro cando se soubo que a coral era a elixida para recibir este ano un dos galardóns máis importantes da cultura galega. Naquel momento a súa presidenta, Fátima Malingre, celebraba con orgullo a noticia e recoñecía a este xornal que “os pillara un pouco por sorpresa”, xa que non esperaban que puidesen estar nomeados a este premio. Neste senso, onte Malingre recolleu o galardón emocionada, lembrando aos integrantes da súa agrupación, con especial alusión aos que xa non están e tamén ás novas xeracións. “Representamos a unha Galicia viva, orgullosa e con voz propia”, destacou.

Tanto para o xurado como para a Xunta e a Deputación de Ourense, ao longo da súa traxectoria -106 anos-, a Coral de Ruada ten feito méritos máis ca suficientes, na súa teima pola defensa e difusión da cultura galega.

Na entrega do Premio Otero Pedrayo estivo tamén o presidente do Parlamento de Galicia, Miguel Ángel Santalices Vieira, quen destacou o traballo da Coral De Ruada “a prol de recuperar e manter a memoria musical galega”. A celebración rematou, como non podía ser doutro xeito, coa actuación da Coral De Ruada que agasallou aos presentes con dúas pezas especiais: “Os teus ollos” e “Negra sombra”.