Os nenos da Valenzá terán “truco ou trato”

O Samaín será moito máis que unha festa terrorífica en Barbadás, onde xa está todo preparado para gozar duns días de moito divertimento. Co fin de dinamizar o sector comercial e a hostalería, o Concello de Barbadás, a través da Concellería de Comercio, que dirixe Marga Pérez, organizou a campaña “Truco ou trato”.

Un total de 20 establecementos da Valenzá sumáronse a esta iniciativa dirixida aos máis pequenos. Os interesados en participar poderán recoller o seu mapa coa ruta no espazo infantil da Solaina ou na biblioteca municipal.

Cando e como

A actividade comezará o martes 31 de outubro ás 18,00 horas e os comerciantes repartirán doces e chuces aos nenos que participen e os visiten ata as 19,30 horas. Para participar hai que ir disfrazado e todos os cativos deberán ir acompañados dun adulto.

Tamén o martes, ao finalizar a campaña “Truco-trato” comezará unha ruta terrorífica pola Valenzá Vella e haberá baile. Aquelas persoas que se sumen á actividade disfrazadas poderán degustar un bolo preñado cos que os agasallará o Concello.

A concelleira de Comercio, Marga Pérez, asegura que con este programa de Samaín preténdese “involucrar a toda á familia, o mesmo tempo que se dinamiza o sector do comercio e a hostalería”.

A programación elaborada polo Concello con motivo do Samaín contará cunha serie de obradoiros – de decoración terrorífica, de cociña temática, de decoración de cabazas- para deixar voar a imaxinación e a creatividade. As prazas son limitadas e deben ser reservadas previamente no correo electrónico espazoinfantil@barbadas.gal.

Primeiras actividades

O Samaín para os máis pequenos comezará xa este xoves, 26 de outubro, cun obradoiro de decoración terrorífica, a partir das 16,00 horas no espazo infantil da Solaina. Mañá venres, 27 de outubro, ofrecerase un obradoiro de cociña que terá prazas limitadas, polo que os interesados en participar deberán inscribirse antes.

Xa o luns, 30 de outubro, tamén no espazo infantil, ofrecerase un obradoiro de cabazas a partir das 16,00 horas.