“Ourense Vivo”, o plan de Pontón para revitalizar a provincia

A portavoz nacional do BNG, Ana Pontón, presentará mañá luns o novo proxecto “Plan Ourense Vivo”, nun acto que terá lugar na cidade e no que tamén participarán deputados, alcaldes e responsables da formación de todas as comarcas. Trátase dun “ambicioso” proxecto de revitalización para o conxunto da provincia, cuxas medidas se darán a coñecer mañá. O plan formará parte do programa de goberno do BNG e terá como eixo central o equilibrio territorial.

A deputada por Ourense Noa Presas declarou que desde o BNG están “centradas no importante”, que é darlle a Galicia un cambio político, deixando atrás as “políticas fracasadas do PP” e a “tremenda desigualdade territorial” galega, “moi clara” en Ourense, “abandonada” por parte do Goberno central e autonómico, que “perde poboación e oportunidades de futuro”.

Presas asegurou que o “Plan Ourense Vivo” é a alternativa que “cambiará o guión deste abandono”, con propostas que van desde o reforzo dos servizos públicos ao impulso económico, así como a reindustrialización, o reforzo do Campus da Auga e a aposta polo termalismo e o medio rural.