A candidata do BNG na Rúa, María González Albert, estudou xornalismo, foi concelleira en Ourense e agora compaxina a campaña co seu obradoiro de repostería creativa.
A candidata do BNG na Rúa, María González Albert, estudou xornalismo, foi concelleira en Ourense e agora compaxina a campaña co seu obradoiro de repostería creativa.
Churchill dixo: "O xornalismo pode levarte moi lonxe sempre que o deixes a tempo". Fíxolle caso.
No plano particular si. O xornalismo é unha profesión fundamental pero no meu caso non servíu.
Foi pioneira no estudo do xornalismo cando case non tiñamos Internet. Ahora adícase á repostería. Somos tan larpeiros ou é unha visionaria?
O da pastelería creativa foi case por casualidade. Pasei unha época maliña, aburríame moito na casa e empecei a facer cousas para nós. Como no xornalismo, semella que unha escolle casualidades.
Cando era concelleira en Ourense considerábana 'valor en alza' do BNG e marchou. Pensouse que xa tiña máis pasado que futuro pero na Rúa volveu á lea política...
A verdade é que cando marchei de Ourense estaba moi queimada e pensei que nunca ía volver á política institucional, pero ao final tes esa pulsión. Gústache e acabas volvendo porque ves cousas nas que podes colaborar.
Cre, como di Xavier Vence, que en Ourense hai medo a ir nunha lista distinta á do PP?
Non diría medo, pero si é certo que segue habendo presións. Resúltame sorprendente que no 2015 aínda haxa ameazas veladas. É lamentable, pero ao final hai xente valente que non ten medo.
Cre que lle falta doce á política?
Á política fáltalle volver a poñerse en contacto coa xente. A teoría de que todos os políticos son iguais fixo moito dano e só serve para que sigan gobernando os mesmos.
Que político lle parece máis doce e cal máis amargo?
A mín gústame moito Lores e o que fixo por Pontevedra. Se houbera máis Lores na política mellor nos iría. Amargo non sabería, pero polo que me toca direi Avelino García Ferradal, o noso alcalde.
Que cociña mal o BNG para que as enquisas advirtan de que perde moitos folgos e apoios?
O BNG está pagando o desprestixio da política e os seus problemas internos. Na esquerda temos o costume de pelexarnos entre nós en vez de preocuparnos do destrozo do PP. Cando gobernas perdes a virxinidade, que agora teñen as plataformas cidadáns, pero todo se cura co tempo.
Dígame un titular para o 24-M.
O PP perde a maioría absoluta e volvemos a ter un goberno de esquerdas na Rúa que non faga políticas caciquís.