Novo vehículo para a Policía Local de Barbadás

A Policía Local de Barbadás estreou onte un novo vehículo trala incorporación dun todo terreo aos equipos da xefatura.

O automóbil, que cumpre cos requisitos medioambientais e de mobilidade, permitirá á Policía Local cubrir espazos urbanos, así como rurais e mesmo zonas de montaña. “Coa incorporación deste vehículo cubrimos unha das importantes carencias deste servizo”, asegurou Xosé Carlos Valcárcel, alcalde de Barbadás.

O alcalde e o xefe da Policía Local de Barbadás, Fernando Freire, recibiron onte as chaves do automóbil. Ao acto de entrega tamén acudiron a tenente alcalde, Victoria Morenza; o edil de Seguridade e Emerxencias, Daniel Rey, así como persoal administrativo da Policía Local e integrantes do equipo de Protección Civil.

Novo efectivo

A chegada do novo vehículo supón o inicio do proceso de modernización da Policía Local impulsado polo Concello de Barbadás. “Está prevista a incorporación dun novo efectivo ao longo deste ano”, recordou o rexedor. Con esta futura praza de Policía Local, o municipio contará cun total de sete axentes en activo.

Neste sentido, cabe recordar que o Sindicato Profesional de Policías Municipales de España (SPPME) ten criticado en varias ocasións a de falta de efectivos de Policía Local en Barbadás.

Por outra banda, dende o propio goberno local tamén sinalan que durante os meses de maio e xuño se mellorarán as comunicacións coa rede dixital Tetra, “un grande avance fundamental para que a veciñanza sexa ben atendida”, en palabras de Valcárcel. Por outra banda, o Concello ten solicitado á Xunta de Galicia a entrega dun vehículo neste 2025 a través do Fondo de Compensación Ambiental. “A mellora na Policía Local de Barbadás será completa ao longo deste ano”, remarcou o alcalde.