Parlamento Xove bate récord con 68 equipos participantes

A Residencia de Tempo Libre do Carballiño foi escenario onte da fase clasificatoria da 16ª edición de Parlamento Xove, que se celebrou con éxito batendo o récord de participantes da pasada edición, con 68 equipos nas tres categorías de Secundaria e Bacharelato, Formación Profesional e Universidade.

O conselleiro de Cultura, Lingua e Xuventude, José López Campos, acompañado pola directora xeral de Xuventude, Lara Meneses, e o delegado territorial da Xunta, Manuel Pardo, comprobou o nivel de oratoria dos 44 mozos universitarios que, durante esta xornada, buscaban a clasificación de cara á fase final. Neste senso, destacou a profesionalidade da mocidade que, a través deste programa, da conta da súa preparación académica.

Parlamento Xove é unha iniciativa da Consellería de Cultura, Lingua e Xuventude que comezou no 2010

No marco da cita, López Campos felicitou aos 264 mozos que competiron baixo a temática “Compénsalle a Europa apostar pola reindustrialización?”. “Seredes as mellores voces que representen a Galicia e aos galegos”, manifestou e, ademais, fixo fincapé no compromiso do Goberno galego coa posta en marcha de programas que chamen á xente nova a participar activamente na sociedade.

Parlamento Xove é unha iniciativa da Consellería de Cultura, Lingua e Xuventude xa consolidada, que se vén celebrando desde o ano 2010. Desde o seu inicio, en todos estes anos teñen debatido máis de 600 equipos de centros escolares de Secundaria, Bacharelato e Universidades o que supón a participación de máis de 3.000 persoas entre estudantes e profesorado.

O certame impulsado pola Xunta de Galicia é unha competición na que os equipos inscritos investigan e debaten sobre un tema. A dificultade da actividade está en que só cinco minutos antes de cada encontro dialéctico procederase ao sorteo da postura a favor ou en contra a adoptar por cada equipo en relación á cuestión formulada.