Sete películas premiadas para desfrutar no Cine Clube de Carballiño

Cine Clube Carballiño ofrece entre xaneiro e febreiro unha escolma dalgunhas das mellores películas desta tempada, con especial atención no cine español. Hoxe comeza coa película xaponesa “La ruleta de la fortuna y la fantasía”, de Ryusuke Hamaguchi, Oso de Prata e Gran Premio do Xurado no Festival de Berlín, que conta as historias de tres mulleres.

En canto ás proxeccións de cinema español, a primeira será “La vida era eso”, de David Martín de los Santos, con dúas magníficas interpretacións a cargo de Anna Castillo e Petra Martínez (Mellor Actriz no Festival de Sevilla e nominada ao Goya polo seu papel).

Continúa a programación cun thriller español, “La hija”, de Manuel Martín Cuenca (nominado ao Goya ao Mellor Director) e protagonizada por Javier Gutiérrez, nominado como Mellor Actor.

“Seis día corrientes” é a última película de Neus Ballús, comedia que triunfou no Festival de Valladolid cos premios do Público e a Espiga de Prata.

Unha producción británica tamén contemplada por Cine Clube Carballiño, “Cerca de ti”, un drama que se centra na familia e a paternidade, dirixido por Uberto Passolini e protagonizado por un magnífico James Norton, e que tamén recibiu o Premio do Público na Seminci de Valladolid.

Ademais, o cine norteamericano estará presente a través da multipremiada (Berlín, Sundance, San Sebastián, entre outros galardóns) e aclamada “Nunca, casi nunca, a veces, siempre”, drama centrado na adolescencia e que se convertiu no último gran éxito do cinema independente USA.

O mes de febreiro pecharase con outra película española, “Libertad”, de Clara Roquet. O filme conta con seis nominacións nos Premios Goya, entre elas a de Mellor Película.