O polbo, eixo vertebrador e dinamizador do turismo local no Carballiño

A Casa da Cultura de Carballiño acolleu este xoves a presentación dun proxecto no que está a traballar o Concello de Carballiño en colaboración coa Xunta de Galicia e a Deputación de Ourense, e que está financiado polos fondos NextGeneration EU.

Na presentación feita polo alcalde, Francisco Fumega; o xefe de área provincial de Turismo Galicia, Cecilio Santalices, e o deputado de Representación Institucional da Deputación de Ourense, Rosendo Fernández, todos agradeceron ó Concelleiro de Turismo, Manuel Dacal, a súa implicación co proxecto de internacionalizar e promover a Festa do Polbo e recalcaron o potencial que esta festa gastronómica e o produto do polbo teñen para o turismo da rexión. Resaltaron tamén que a desestacionalización da Festa do Polbo e a continúa ampliación dos eventos relacionados conseguiron convertila en motor da vida da vila durante todo o verán, atraendo a milleiros de visitantes.

As conferencias e mesas redondas abordaron a enogastronomía como elemento central da experiencia turística. Carlos Martins, experto en enogastronomía e turismo, falou da importancia de construír unha oferta turística ao redor dos produtos gastronómicos locais e a súa conexión co territorio. As mesas redondas “Os clubs de produto como elemento de vertebración do turismo gastronómico” e “O papel dos concellos impulsando a gastronomía local” abordaron o valor destas iniciativas para incrementar a competitividade das empresas locais e a necesidade da colaboración público-privada para implicar ao tecido económico nunha estratexia a longo prazo.

O Club de Produto Polbo con Orixe busca consolidar O Carballiño como un destino turístico de referencia no eido enogastronómico, situando ao polbo como eixe principal dunha actuación que tamén fortalece a conexión con outros produtos da contorna.