Oposición á instalación de ALTRI

Con estupor lin as declaracións do Sr. Rueda tras a non asignación de fondos europeos ao proxecto de Altri, entendendo a lóxica da Xunta na busca de investimentos para Galicia, e vital analizar detidamente as implicacións deste tipo de proxectos industriais a gran escala, ou non se deu conta da oposición que hai en Galicia a ese proxecto incluso de alcaldes do seu propio partido.

A insistencia en facilita-la implantación dunha macrocelulosa, obviando as posibles consecuencias ambientais, sociais e económicas negativas, paréceme unha visión curtoplacista do desenvolvemento.

É preocupante que se critique a denegación de fondos europeos por “esixencias ambientais excesivas”, cando precisamente son esas salvagardas as que protexen o noso patrimonio natural.

Ademais, é inquedante o uso do argumento do “trato desigual” por parte do Goberno central como cortina de fume para eludir un debate serio sobre o impacto real deste tipo de proxectos. Esixir menos controis ambientais non debería ser unha solución, senón un motivo de alarma. É precisamente a través destes filtros que protexemos o patrimonio natural de todos e evitamos erros do pasado, como o de Ence en Pontevedra, cuxas consecuencias seguimos pagando.

Finalmente, considero que a petición de xestionar directamente fondos europeos sen a supervisión de criterios ambientais rigorosos a nivel estatal podería interpretarse como un intento de eludir controis necesarios para a protección do noso territorio. A transparencia e a rendición de contas na xestión de fondos públicos son esenciais para garantir un desenvolvemento xusto e sustentable.

En lugar de insistir en pro-xectos de dubidoso beneficio ambiental, avogo por unha reflexión profunda sobre o modelo de desenvolvemento que queremos para Galicia: un que equilibre a actividade económica coa preservación do noso valioso patrimonio natural.