Chandrexa de Queixa marida o seu cordeiro cunha gran festa

XANTAR MULTITUDINARIO

O cordeiro foi o prato principal arredor do que xirou a xornada festiva deste sábado no concello de Chandrexa de Queixa, que celebrou por todo o alto a XIV edición da súa Festa do Cordeiro

Chandrexa marida o seu cordeiro cunha gran festa | Cedida

Centos de veciños e de visitantes achegáronse ata Chandrexa de Queixa, en Terra de Trives, co fin de desfrutar o delicioso cordeiro ao espeto, grazas ás degustación gratuítas que se ofreceron dende o mediodía.

A sesión vermú, amenizada polo dúo Ángel América, deu paso a un xantar popular con preto dun milleiro de comensais, no que non faltou o cordeiro ao forno, acompañado por empanada de iscos, pementos e bica local de postre.

As degustacións de cordeiro ao espeto triunfaron entre os visitantes. | Cedida

Xa pola tarde, Chandrexa continuou a festa con máis música e unha gran pancetada, anticipo dunha verbena da man da orquestra Tango e da discomóbil Stuu.

Presenza institucional

Representantes institucionais este sábado en Chandrexa. | La Región

A Festa do Cordeiro atraeu a numerosos cargos institucionais, entre eles o presidente do Parlamento, Miguel Santalices; conselleiro de Emprego, Comercio e Emigración, José González; o conselleiro de Facenda e Administración Pública, Miguel Corgos, e a conselleira de Vivenda e Planificación de Infraestruturas, María Martínez Allegue.

Tamén asistiu o deputado provincial de Dinamización do Medio Rural e alcalde de San Xoán de Río, Xosé Miguel Pérez, así como a alcaldesa de Viana do Bolo, Melisa Macía, o de Manzaneda, Amable Fernández, o de Parada de Sil, Aquilino Domínguez e o de Montederramo, Óscar Diéguez.