Celanova reivindica o uso do galego na Xustiza

Un total de 38 concellos da provincia de Ourense confirmaron a súa adhesión á bautizada como "Declaración de Celanova", que,este xoves, a partir das 12,00 horas, asinarase na vila de San Rosendo para promover o uso do galego na administración de Xustiza. A Irmandade Xurídica Galega é a organizadora dun acto que se enmarca na conmemoración do 25 aniversario do primeiro expediente xudicial desenvolto integramente en galego, e que foi impulsado polo Xulgado celanovés, sendo xuíz o actual alcalde, Antonio Puga, e con Anselmo Menéndez como secretario.

A celebración comezará ao mediodía co descubrimento dunha placa conmemorativa no interior do Xulgado de Primeira Instancia e Instrucción "que deixará constancia do feito, e na que figurara o xuíz que a ditou e o secretario do Xulgado que participou na instrución do caso xulgado", explicaba Xosé González. Acto seguido, xuristas e rexedores trasladaranse ao Claustro Barroco do Mosteiro de San Rosendo. "Alí darase a coñecer a Declaración de Celanova, procedéndose a asinala por parte dos alcaldes e alcaldesas presentes", matizaba González, quen confirmou a participación musical de María do Ceo.