Os cativos de Laza levan o Samaín á rúa

Quen marca a data do Samaín? En Laza os cativos. Tiveron que pospor a súa celebración por mor da choiva e, por fin, uns días despois, os alumnos do CEIP O Castiñeiro de Laza puideron desfrutar desta celebración. Unha cita que versou na convivencia entre nenos e adultos, coas rúas lazanas decoradas e os cativos presumindo de disfraces de medo.

Os alumnos do colexio rural, baixo o lema “Rebelión da Granxa polas rúas de Laza”, saíron o pasado venres á rúa para petar na porta dos establecementos comerciais e nas casas dos seus veciños para dar algún que outro susto e para encher as bolsas de chuches.

Foi unha xornada “moi divertida”, como anotaron dende o centro educativo, e na que todos os veciños participaron na iniciativa. Incluso moitos decoraron os seus establecementos e casas para facer de Laza un auténtico escenario de Samaín no que non faltara de nada. Tras unha mañá percorrendo o municipio, os cativos puideron desfrutar dos caramelos e lambetadas que recolleron, pensando xa na festa do vindeiro ano.

Ademais, dende o centro tamén traballaron durante a semana previa á celebración na “orixe e a festividade do Samaín, lendo contos, con actividades relacionadas e decorando o colexio coas nosas propias mans”, remarcan dende O Castiñeiro. “É unha maneira de desenvolver as habilidades manuais e a creatividade”, conclúen dende o colexio de Laza, satisfeitos co traballo realizado polo seu alumnado e a implicación das familias e veciños da localidade.