Música, unha visita guiada e unha cea no Serán da Pousa, en Monterrei

O sábado 2 de setembro a aldea de A Pousa, no concello de Monterrei acollerá a terceira edición do Serán da Pousa, unha xornada festiva inspirada nos tradicionais “seráns” nos que a música tradicional é a protagonista, xunto cunha variada proposta de actividades que poñen en valor o respecto á natureza e a vida na aldea.

“Trátase dunha iniciativa que levamos a cabo as veciñas do pobo, co obxectivo principal de unir música tradicional, natureza e convivencia interxeracional á beira do río Támega”, explican dende a organización. Durante toda a xornada faranse actividades que culminarán cunha cea popular con porco ó espeto, empanada, bica e musica “a fartar”, din.

A programación desta terceira edición do Serán comezará ás 12,30 horas cunha sesión vermú con música en directo. Nesta participarán músicos da comarca que amenizarán a Lagoa -epicentro da festa- con éxitos de todos os tempo. “Todos os músicos que queiran participar, xa sexa tocando ou cantando, só teñen que achegarse, contamos con micro aberto”, animan dende a organización.

Tras isto será a hora do “pícnic compartido” á beira do río para retomar a antiga costume de comer coa familia e as amizadas nas festas ao aire libre. Xa pola tarde, ás 17,30 horas, haberá unha actividade novidosa este ano para dar a coñecer a aldea a través dos seus veciños máis lonxevos: “A Pousa Free Tour”.

Os participantes visitarán a aldea acompañados de música. “A través desta actividade buscamos involucrar ás persoas de máis idade da aldea, e aprender máis sobre A Pousa, as propias veciñas e a xente que nos visita. Ademais, agora acabamos de estrear beirarrúas, é un bo momento para ensinar a aldea e celebrar esta humanización da estrada”, anotan as veciñas.

O prato forte da xornada é o serán no que a música virá da man de catro grupos de música tradicional: Nova Era, Candaira, Os Trouleiros de Medeiros e Os Chavalines. Tras a “troula”, será a hora da cea popular. Os interesados en participar nela poderán adquirir as entradas ata o 1 de setembro, por 8 euros.

A cita rematará cunha foliada compartida que continuará despois do lusco fusco ata converterse nun “guateque” ao carón do río Támega, no que a música galega será a máxima protagonista. Todo arredor da Lagoa, a praia fluvial de A Pousa e un lugar moi visitado polos veciños de toda a comarca.