Preocupación polo incremento da violencia de xénero na comarca de Monterrei

O aumento de casos de violencia de xénero na comarca, con en torno a 60 casos activos nestes momentos, a meirande parte dos cales concéntranse en Verín, a vila con maior poboación, foi o principal asunto sobre o que xirou a reunión da Mesa de coordinación interinstitucional contra a violencia de xénero, que tivo lugar o pasado venres no Concello verinense.

Ademais de mencionarse as estatísticas e número de casos de violencia de xénero, tamén se abordou a situación dos menores de idade afectados por este tipo de violencia. Dende os recursos sociais públicos dos Concellos e o Centro de Información á Muller (CIM) da Mancomunidade realizáronse diferentes peticións nese sentido.

Unha das principais reclamacións foi a apertura “urxente” do Punto de Encontro Familiar de Verín, o décimo recurso destas características da Consellería de Política Social e Igualdade en toda Galicia, e cuxa apertura estaba prevista para o primeiro trimestre deste ano.

Outra das peticións que se realizou durante a sesión foi a de retomar a Unidade de Condutas Aditivas no Hospital verinense, para prestar servizo ás familias que o precisen, ao igual que a apertura de garderías públicas, co fin de favorecer a conciliación familiar e laboral.

Por último, alén de solicitar recursos para os servizos públicos que atenden os casos de violencia de xénero, dos que o CIM atende 95 relacionados con esa problemática, pediuse un centro cívico con ocio e formación para a xuventude.

Representantes comarcais

A Mesa contou con diferentes representantes políticos comarcais: Diego Lourenzo, José Luis Suárez, Ana Villarino, Marina Lovelace e María del Mar Valle.

Tamén interviron María Alida Iglesias, xefa provincial da Unidade contra a violencia de xénero da Subdelegación do Goberno en Ourense; Rodrigo Barba Alvedro, director xeral da Loita contra a violencia de xénero da Xunta, e María Iglesias Bueno, maxistrada do Xulgado de Verín.