Programa do FIC Vía XIV de Verín 2024: ata dez días de arte e cine

Todo está listo en Verín para dar este xoves ás 22:15 horas na Praza García Barbón, o pistoletazo de saída á novena edición do FIC Vía XIV. Un total de 26 filmes de máis de 10 nacionalidades diferentes e unha completa axenda con máis de vintena de actividades paralelas para todos os públicos completan a programación que o mércores se presentou na vila do Támega, coa participación de Samanta Barreira, concelleira de Cultura, Turismo, Festexos e Conservatorio; Marcos Vázquez, director de Cultura e Deporte da Deputación de Ourense; e Carlos Montero, director do FIC Vía XIV.

Nesta novena edición “contamos con moitas novidades que reforzan os eixos nos que se basea o FIC Vía XIV: potenciar o talento local, converter a Verín no epicentro cultural da contorna e situar a vila do Támega no mapa, amosando ao mundo a nosa idiosincrasia e os valores que nos definen como sociedade”, dixo Carlos Montero, director do festival, quen destacou a versatilidade da programación deste ano e quixo agradecer ás diferentes entidades organizadoras, patrocinadoras e colaboradoras do FIC.

Samanta Barreira falou da sentida homenaxe que se lle rendirá a Plácido Romero, cineasta verinense recentemente falecido, e tamén salientou a importancia do FIC Vía XIV na creación de sinerxías entre os distintos axentes económicos, culturais e sociais da vila; e fortalecendo os lazos comunitarios. Pola súa banda, o Director de Cultura e Deporte da Deputación de Ourense, Marcos Vázquez, trasladou que para o ente provincial é unha satisfacción colaborar “cun evento que xa é un referente cultural na nosa provincia, que potencia a todo o sector audiovisual, que reforza á Provincia de Ourense como terra de cinema, e que ademais non só promove a arte e a cultura, senón que tamén reforza os lazos da nosa comunidade e os lazos con culturas diferentes, así como pon en valor ao tecido social e empresarial de Verín”.

Curtas e Xurado

Un total de 26 pezas de diferentes partes de España, Portugal, Palestina, Chipre ou Taiwán participarán no concurso oficial, cun xurado profesional composto por Severiano Casal del Rey, O Festival Entre Curtas e Nora Sola. Asemade, o FIC pon o foco na valorización do talento local coa creación do espazo Cinema da casa, que alberga pezas audiovisuais creadas na contorna de Verín e que entrarán no concurso oficial.

As curtas poderán visionarse no Auditorio de Verín entre o luns 2 e o venres 7 de setembro (haberá un bono de 25 euros). O sábado 7 terá lugar a gala final, dirixida por Manuel Cortés, coa clausura e a entrega de premios aos mellores traballos.

Maridaxe cultural que incluirá a estrea de "OriXes"

O Auditorio Municipal de Verín acollerá o venres ás 21:30 horas un dos eventos máis esperados polo público local: a estrea do audiovisual “OriXes: dez anos de Nova Era”, que narra de primeira man a historia dun grupo de rapaces do concello que, fai dez anos, atoparon na música tradicional o seu espazo creativo. A banda de gaitas Nova Era “revitalizou a música tradicional da zona”, subliña a organización, que destacou que a banda permitiu a moita xente ter a posibilidade de tocar un instrumento en comunidade. Na páxina web xa se pode facer a reserva para esta e outros eventos da programación paralela que, ao longo desta semana, celebrarase en diferentes espazos de Verín.

Oficialmente o FIC Vía XIV comeza este xoves á noite no centro de Verín. Un evento que este ano estará protagonizado polo grupo Caspervek, que musicalizará ao aire libre e en directo as curtas Fantasmagorie, Alicia País nas Marabillas e Sherlock Holmes.

As actividades paralelas continuarán ata o domingo co espazo Nosteramus, monólogos, experiencia gastronómica multisensorial, concurso de pintura, concertos, podcasts e gravación dunha curtametraxe documental, así como unha exposición fotográfica e a colaboración cos festivais Entre Curtas de Chaves e a Mostra Internacional de Cinema Etnográfico de Santiago de Compostela (MICE).