Riós repartirá 25 composteiros e formará sobre o seu emprego

Esta campaña contará co reparto dun total de 25 composteiros de plástico facilitados pola empresa Sogama. Con capacidade para 400 litros e fabricados con materiais reciclados e reciclables, sortearanse en vindeiras datas no marco das visitas que a alcaldesa do Concello, Eva Barrio, ten previsto realizar.

Barrio confirma que acudirá “persoalmente aos núcleos para comunicarlles os cambios no recibo e explicarei como se fai a compostaxe, para o que tampouco é indispensable ter un composteiro de plástico. De feito é algo que se leva facendo no rural toda a vida”.

En todo caso a intención da mandataria é transmitir tamén aos veciños “o ciclo completo do lixo, dende que o botan nos contenedores ata que chega a Sogama”.

Novo recibo do lixo

As reunións servirán para explicar á veciñanza o funcionamento do novo recibo da recollida do lixo da Deputación, no que dende este mes de xaneiro é posible reducir o custo anual un 40% a travéz da reciclaxe, un 10% por realizar dúas entregas no Punto Limpo, e outro 30% polo uso e mantemento dun composteiro no fogar.