A telefonía e as compras online, líderes en 2024 en reclamacións en Verín

Entre reclamacións, consultas e mediacións por parte da veciñanza, os sectores da telefonía e das compras online concentran un total de 362 e de 167 casos rexistrados, respectivamente.

Os motivos no caso da telefonía fixa, móbil e internet son o incumprimento de ofertas prometidas verbalmente, a falta de envío do contrato coas condicións pactadas, facturacións incorrectas, cargos inxustificados e deficiencias no servizo.

Na compra online, os veciños denunciaron non recibir o produto, falta de stock sen devolución do diñeiro ou cobros indebidos por devolucións tralo desistimento, atrasos na devolución do importe ou desaparición do vendedor.

O terceiro sector con máis reclamacións foi o eléctrico, con 55 casos, principalmente por problemas de facturación, cambios non autorizados da comercializadora e cobros indebidos de servizos de mantemento.

Ademais, rexistráronse queixas en sectores como seguros, banca, mensaxería, liñas aéreas e reparación de vehículos, cun total de 48 reclamacións.

En moitos casos, non foi posible formalizar unha reclamación debido á falta de información sobre a empresa na páxina web, especialmente cando se trata de comercios fóra da UE. Fronte a estes problemas, a OMIC subliña a seguridade que ofrece o comercio local, onde as reclamacións son mínimas.

Estafas mediante SMS

Outro dos problemas detectados foi a proliferación de mensaxes SMS fraudulentos, nos que se suplanta a identidade de organismos oficiais como Correos ou a Axencia Tributaria.