Francisco Fumega: "Pactar co PP custoume estar días sen durmir"

Francisco Fumega defende que esta era a única solución para reactivar o municipio que goberna e afirma estar confiado en que se solucione o expediente que lle abriu a dirección do partido.

Como foi ese proceso para tomar a decisión de pactar co Partido Popular? Custoulle dar o paso?

Foi unha decisión que non foi fácil de tomar. A min custoume varias noites sen durmir, sinceramente, pero no partido entendíamos que era a única maneira de evitar que nos fixeran unha moción de censura e que chegara outro partido a alcaldía. Ademais, non podíamos seguir neste impase no que O Carballiño non ía a ningún sitio.

Nese momento o PSOE abriulle un expediente, como lle afectou isto?

Eu son unha persoa de esquerdas, que sempre votará ideas progresistas, polo que persoalmente non me fixo moita gracia. O PSOE é un partido garantista, que nos permite facer unha serie de alegacións, e iso fixen, expliqueilles os motivos e as causas que me levaron a tomar esta decisión. Seguimos dentro dese proceso de alegacións e confío en que se analice con rigor as miñas explicacións.

Confía en que queda só nun expediente ou ten temor a unha posible expulsión?

Teño confianza en que esta toda situación teña unha solución. Creo que as miñas alegacións son razoadas e esa confianza danma sobre todo os compañeiros da agrupación local. Esta non foi unha decisión de Paco Fumega, foi unha decisión de consenso con toda a militancia. Non hai que esquecer que na oposición temos un partido que pacta con demo con tal de prexudicar ao PSOE, e este contexto debería pesar na decisión do partido.

Hasta ese momento era o único pacto PP-PSOE desas características que se producira en Galicia, pero recentemente tivemos outro exemplo no concello veciño do Irixo cunha moción de censura.

Era o único con certa entidade, pero houbo tamén pactos en concellos máis pequenos. É verdade que o do Carballiño focalizou a atención porque coincidiu cun momento no que a relación PSOE-PP a nivel nacional era moi tensa. No caso do Irixo, con todo o respecto para os compañeiros, eu non entendín que non se chegara a un acordo dende o principio.

Cal é a súa relación agora mesmo ca dirección do partido en Galicia?

É unha relación correcta e de respecto, a espera de que tomen unha decisión respecto ao meu expediente.

Cree que a cidadanía entendeu o pacto?

Entendo que si. Nunha enquisa que fixemos o 90% da poboación mostraba o seu apoio a este pacto.

Esa situación de bloqueo que mencionaba é similar a que se vive no Concello de Ourense, pero aquí parece imposible chegar a un acordo.

É diferente. Na cidade entran en xogo outras institucións e isto frea posibles acordos que noutro contexto sería posible levar a cabo.

Como está a ser o día a día na goberno do Concello?

Evidentemente hai posturas diferentes, por iso levamos a cabo un labor continuo de diálogo para remar todos na mesma dirección.

Cree que falta capacidade de diálogo na política actual?

A política é a arte do diálogo. Creo que primeiro é necesario separar política e xustiza, porque hoxe en día xa no se sabe sen mandan máis os políticos ou os xuíces. Isto o que fai é afastar a xente válida para política.

Chegou a falar cara á a cara con Besteiro antes ou despois do pacto?

Evidentemente, antes e despois. Deume unha opinión que non vou transmitir, e eu deille a miña. Eu entendo a postura do partido, xa que a nivel nacional existe moita pelexa co PP, e creo que Besteiro entendeu a miña postura e cal é a situación que temos no Carballiño, onde non é casualidade que unha persoa que foi secretario do PSdeG sexa agora a oposición ao partido.

O acordo co PP implica que non acabara o mandato como alcalde, senón como tenente de alcalde, como cree que vai levar o cambio?

Con toda a naturalidade do mundo. Seguiremos traballando ca mesa intensidade ca que traballamos na alcaldía. Dentro de tres anos haberá outra cita electoral e estaremos aí con toda a forza do mundo para dar resposta as necesidades dos veciños do Carballiño.