As piscinas de Ponte Noalla e Soutopenedo abren hoxe, as do Parque Tecnolóxico, mañá

O verán xa está aquí e as piscinas da Valenzá xa non son as únicas da comarca de Ourense que están abertas. O Concello de San Cibrao inaugura hoxe as dúas instalacións municipais: Ponte Noalla e Soutopenedo. Ambas estarán operativas dende hoxe ata o 10 de setembro en horario de 13,00 a 21,00 horas. O bono da tempada completa para os empadroados será de 10 euros, mentres que para os non empadroados será de 40. No que respecta ás entradas dun só día, para os empadroados menores de 3 anos ou maiores de 65 será de balde; para os mozos menores de 16 será dun euro e para os adultos de dous. No caso dos non empadroados, para os máis pequenos seguirá a ser gratis; para os adolescentes será dun euro e para os maiores de dous.

Pola súa banda, a piscina do Parque Tecnolóxico abrirá mañá a súa porta e estará aberta tamén ata o 10 de setembro. Neste caso, o horario será de 12,30 a 20,30 horas, e esíxese aos usuarios que merquen as entradas de forma anticipada. Para estas instalacións non hai abono de tempada completa, e a entrada diaria custa dous euros.