Barbadás estrea a tempada de piscina na área metropolitana de Ourense

O bo tempo permitiu onte, por fin, dar inicio á tempada de piscinas na área metropolitana de Ourense. As piscinas de Barbadás foron as encargadas de dar arranque á tempada de piscinas municipais, e onte xa houbo unha afluencia importante de xente que buscaba sufocar a calor da tarde. Iso si, non é o primeiro día que estas instalacións están abertas, xa que a data de apertura oficial foi este luns, aínda que as tormentas dos últimos días impideron inauguralas.

Durante o mes de xuño as piscinas da Valenzá abrirán as súas portas de 16,00 a 21,00 horas. Por outra banda, no mes de xullo, agosto e ata o 10 de setembro, data prevista para o peche, o horario será pola mañá de 12,00 a 15,00 e pola tarde de 16,00 a 21,00.

Abonos a seis euros

Os abonos e as entradas diarias están dispoñibles desde o pasado día 7 de xuño soamente para os empadroados no municipio a través da aplicación do ximnasio virtual ou a páxina web do concello. O prezo do abono para maiores de 16 anos é de seis euros. No caso dos menores de 16 o prezo que deben abonar por toda a tempada é de tres euros.

Estes son os mesmos prezos que o ano pasado e un dos máis económicos de toda a zona, o que fai que os veciños da zona opten polas instalacións do seu municipio. Ademais, este ano si estarán operativos os vestiarios para maior comodidade dos usuarios.