A praza de don Ramón Otero Pedrayo en Trasalba

Cen anos despois de que don Ramón Otero Pedrayo e dona Fita xuntaran as súas vidas un 6 de agosto de 1923, unha unión que nunca se rompeu ata que a morte os separou, Trasalba volveu render homenaxe ao patriarca das Letras Galegas. Onte presentouse en sociedade a futura Praza de Don Ramón Otero Pedrayo, que se situará no espazo situado a escasos metros do Pazo entre o adro da igrexa -ao que matrimonio acudía todos os domingos que estaba na aldea á misa- e o muro do Souto, a proposta da Fundación Otero Pedrayo. Unha parcela que fora propiedade de don Ramón e que doara aos veciños de Trasalba hai 47 anos. Onte, fíxose un acto solemne nesa localización de 1.090 metros cadrados que se transformará en homenaxe ao patriarca das Letras. O Concello de Amoeiro acolleu con “bos ollos” a proposta da Fundación, como dixo o alcalde, José Luis González, e está a tramitar o expediente para urbanizar o espazo.

A Fundación Otero Pedrayo celebrou, como todos os anos, un día na honra de don Ramón, quen no momento da súa morte “deixara escrita a súa vontade de que durante varios anos despois do seu pasamento, 15, di nun dos seus testamentos, se celebre anualmente unha misa “pol´a miña yalma”, explicou o presidente da Fundación, Eduardo López Pereira. ”Esa súa vontade quedou manifestada en tres testamentos hológrafos que redactou en 1935, 1941 e 1958”, uns testamentos editados por Patricia Arias Chachero e que onte se entregaron a todos os asistentes ao acto.

Conxugando pois o centenario do matrimonio, a misa anual por don Ramón e a conmemoración de 75 aniversario do cruceiro que o patriarca das letras construíu perto da igrexa, Trasalba acolleu unha festa que comezou coa eucaristía oficiada polo señor bispo, Leonardo Lemos, e cantada polo coro Voces Graves de Vigo. Posteriomente, xa no Pazo, continuou coa actuación do coro e a representación do grupo de teatro Platea, que representou aspectos da vida do célebre escritor galego.