A Xunta de Galicia afea a “inacción” do Concello de Barbadás

Trala reclamación realizada polo goberno de Barbadás, esixindo un instituto para o municipio, a Consellería de Educación precisou que se teñen atendido as “necesidades de escolarización” do alumnado de secundaria, “mentres que o Concello non foi quen de poñer a disposición uns terreos para construír un novo instituto”. Desde a consellería lamentan a “inacción” municipal ao tempo que resaltan que a Xunta optou por ampliar o IES Xesús Ferro Couselo, na cidade e o máis próximo a Barbadás, cun investimento de tres millóns de euros. A Xunta lembrou que quen asume o transporte escolar é Educación e tamén quen financia o comedor escolar.

“Neste momento, coa devandita ampliación, as necesidades de prazas de Secundaria para os rapaces de Barbadás están cubertas. Ademais, o Concello non presentou á Xunta ningún terreo que poida ceder para a construción dun novo centro, nin temos constancia de que dispoña de ningunha parcela coa viabilidade urbanística para este fin”, conclúen.

Pola súa banda, o alcalde de Barbadás, Xosé Carlos Valcárcel, insistiu en que crear o instituto é cuestión de “vontade política”, xa que a situación hoxe é a mesma que cando en 2009 se anunciaron as obras: “É o mesmo solar, por qué entón se podía facer e agora non?”.